幼稚園K1面試嚟到尾聲，唔知各位新手媽媽有無喺過程入面遇到意想不到嘅狀況呢？例如：以為小朋友會呆呆濟濟唔講嘢，點知開籠雀上身？又或者明明無同佢玩過嘅玩具，佢竟然玩到出神入化？回想起鯊寶面試嘅趣事，我諗其實都可以講足一日，至於最震撼嘅都莫過於係佢答啱晒老師題目，喺表現平穩嘅一刻，佢竟然兜口兜面同老師講：「我唔鍾意呢度。」都實在夠晒「驚喜」！
經歷種種「驚喜」之後，有唔少媽媽都忍不住要喺討論區同大家分享自己嘅幼稚園面試初體驗，有得笑就固然好，之但係好多情況下都係又灰心又傷心：
「好傷心間間都係後備，仲要係下午班。」
「我反而驚我個女太佻皮無人收。」
呢邊廂有媽媽因為小朋友過於文靜而擔心，甚至因為結果唔理想而感到灰心又失望，那邊廂亦有媽媽因為小朋友太過有主見，好奇心特強，而憂慮表現唔夠專注，影響面試結果，認真係左右做人難！
討論區熱話：怕羞仔in幼稚園 好心灰
討論區熱話：怕羞仔in幼稚園 好心灰
綜合以往鯊寶嘅面試表現同結果，鯊魚太始終覺得老師收生標準絕對係：無！得！估！所以講得老土啲，其實盡咗力就夠啦，始終每間學校期望收嘅學生都唔同，決定權既然落喺老師到，咁又何必以自己嘅面試標準去衡量小朋友考得好唔好呢？
每個小朋友都有自己嘅優點，要點樣將優點轉化成為優勢，就要靠父母嘅選校功夫，如果考唔到家長心儀嘅學校，其實亦唔表代小朋友係唔好，又或者某種性格輸蝕過人，大概都只係因為唔適合個別學校啫！至於，如果喺面試期間，因為突發事故而影響小朋友表現，例如：大病初癒、未瞓醒等等，或者可以試下寫求位信比學校，盡最後努力爭取一個心儀學位！
【編按：以上內容為作者之個人意見及立場】
