葉劉淑儀以書面質詢教育局長兩年半外訪21次，希望局長提供資料，並對局長外訪以「鞏固本港作為區域教育樞紐的角色」一說甚有保留。有議員賜吳局長以「旅遊局長」另類官銜，

這自然有挖苦意味，但平均一個月左右就「瀟灑走一回」確實惹人側目。可能有人小器，吃不到葡萄，羨慕局長可以用公帑呢度去，嗰度去，但小婦人心水清，吳克儉確實刷新了一個紀錄，他是香港有史以來外訪最多的教育頭頭，當然，更是飛行哩數破紀錄的局長。

 

「勤力」外訪 在港政績不彰

香港人滿腹陰謀論，以為吳局長鍾意遊飛機河，王師奶想問，點解唔可以用欣賞角度去看事物？行船走馬三分險，何况坐住嚿鐵在空中半天吊，飛來又飛去！局長冒生命危險為香港教育奔走，香港人不知感恩，還「阿之阿咗」，未免說不過去。換一個觀點：香港從未有過一個咁勤力，咁有犧牲精神的教育局長。有人話王師奶偏幫吳克儉，叫小婦人講一件局長可以擺得上枱，見得人的「德政」讓大家品評。回顧局長上任30個月以來，王師奶諗到頭殼出煙都諗唔到半件，但雞毛鴨血的瘀事就可隨口而出。照計梁特首是吳局長的頂爺，他四處衝鋒陷陣一定要得到特首同意，換言之，特首是同意他的愛將四處hea，閒雜人等，應該shut up。有議員質疑他到處考察，有所見，有所聞，應該有所得，何以局長青山綠水之後，一事無成，正如俗語所謂「只見身郁，唔見米白」。王師奶早就提過局長寫「考察」報告，一來可將見聞與教育界或關心教育前景的市民如王師奶之流分享，二來可塞住乜議員物議員無聊之口，局長何樂不為？如果你堅持沉默是金，一來表示你去咗等於無去，睇咗等於無睇，民調一定繼續壓軸，同陳局長做沙煲兄弟，低處未見低。揸支筆寫吓報告，便可揚名聲，顯父母，做喇，局長，仔女都面有光彩㗎。

 

忠言相勸  先安內

王師奶不是葉劉的fans，也不全認同她某些驚人之論，小婦人就公開反對她提議將通識科改作選修科，說這是遺半禍於人間。不能否認，今次向吳克儉的質詢是有做功課的，她認為香港國際學校學位不足，本地生英文和數學水平下降，本地生與外地生交流不足都是事實，她以「與其屢次掛帥遠征，倒不如坐鎮添馬」忠言相勸，局長不宜以逆耳之言看待。孔子說過﹕「行有餘力，則以學文」，如果自己內部成身蟻，人人都話你唔掂，你還四處wet，邊有人睇得你起？現在情况就好似有些瀕臨崩潰的國家，內部搞唔掂，反而向外打仗，撩是鬥非。

 

吳局長，寫報告喇，等全香港嘅人知道你做緊嘢，不是Simon Fan。

 

 

文﹕王師奶@明報教得樂

作者簡介:不是普通師奶，家中米缸有幾多斤唔知，但對香港教育界有幾多牛鬼蛇神，有幾多「嗚喱單刀」措施，卻一清二楚。「論盡教育」絕不手軟。