唔知大家仲記唔記得自己嘅中學時代，到底用緊咩書包？同同學食Tea會去邊度打躉？當時你嘅生活指數又係點架呢？

見到forum有人提到現今中學生消費力真係好高，無論衣食住行都好有品味人生嘅感覺，甚至有被過度寵愛嘅嫌疑：「我7O後，小學一年一個有公仔背包已開心到飛起 」、「咩年代都有追名牌的一群」、「好多中學生買野係話唔洗找，一、兩蚊唔係錢，跌落地都唔執！」

睇下睇下，其實又真係覺得現今啲學生哥好似都幾嘆，周不時行過名牌化妝專櫃都見到有學生揀緊唇膏、化妝品，高消費咖啡店坐滿學生帶住部Notebook溫書、做功課，真係令人眼都紅埋！不過諗真啲，其實自己做學生嗰陣消費力都唔係弱，只係年代唔同消費唔同啫！

我個人覺得，其實做學生向來喺屋企入面都係最有錢嘅人，就算父母係低收入，就算佢哋幾辛苦都好願意畀最好嘅嘢你，每年點都買個新書包，就算貴，只要畀得到都肯畀，為嘅可能就只係怕你比同學睇小，返學會唔開心。

記得自己中學年代媽咪都會買有品牌嘅書包畀自己，但有時見佢有啲更名貴嘅包包，都好想借嚟返學校威下，而當時佢嘅一番說話就令我記到依家：「借畀你用當然唔係問題，反正都係擺喺度，但唔同年紀應該用返適合自己年紀嘅品牌，如果細細個已經用一級牌子，大個仲可以買咩？自己大個努力搵錢買先有成就感架嘛！」，當然大個之後，你會覺得包包呀！包包！世界係有買唔完嘅包包，但確實自己買，先可以感覺到嗰種得來不易嘅飢渴感！

生活與教導大概就係咁！

入嚟討論區一齊傾