大家時有所聞，所謂「假期後症候群」，是一個典型的都市病。範指長假期後，因要再返工返學而感到的焦慮害怕、四肢無力、胃口欠佳、精神緊張等等症狀。昨天二〇一七年一月三日，長假期後的第一個工作日返學日，家裡多了一個成員病發：大仔。

 

秋冬天氣凍，試問又有誰人能夠敵得過溫暖的被窩？說到底毒男爸爸已經幾廿歲人，對這個症候群已經病重得每日起身返工都有焦慮害怕、四肢無力、胃口欠佳、精神緊張等等恆常症狀。但現實歸現實，我典來典去仍然會爬去梳洗，死死氣返工⋯…但是，剛病發的小朋友又如何？

 

昨早，一眼望去大仔張床，心知不妙。因為這條大大的懶蟲，很明顯睡醒了，更瞪大眼看著我，面露微笑並擺出一幅奸巧的模樣……

 

其實對這情景，我已經有充分的心理準備。對於一個只有三歲多的小朋友，「假期後症候群」比較明顯的徵狀應該是行為比正常粗魯、高聲說話和諸多藉口不去返學。

 

果然，望了兩眼，他已經大叫：「爸爸唔好睇住我啦！」

我還了個微笑：「爸爸去換衫返工呀，你要做乜呀？」

「⋯…」大懶蟲擺明車馬，由床頭碌到床尾，再由床尾碌回床頭。全程目光沒有離開我，更附送奸笑。

「喂！爸爸換衫返工，你要換衫返學啦。」我認真說。

「我．唔．返！」

 

這時候，家長們不要大聲責罵，也不要威嚇小朋友，因為這樣只會増添壓力，小朋友更加抗拒，適得其反。就算他們勉強服從予父母的威嚴之下，長遠也會積壓情緒，並非好事。

 

其實臨近返學之時，我和老婆做了以下幾個工夫，好讓他習慣重返校園之日：

 

1. 一起做功課

盡量避免在一兩日內完成所有假期功課，要把它們當成日常作業，令小朋友持續返學時的Routine。就算作業不能每日都有，也盡可能在同一時段，做一些和學習有關的活動。

 

2. 和同學見面

相約幾個相熟的同學仔，一起去逛逛街、食餐飯。不需要大型活動，主要旨在使小朋友不致於忘記學校和同學相處的時光，加強牽絆。

 

3. 談談新學期

和他看看返學後會學的新課本。但謹記，這只是勾起他們一點學習興趣，而非學習課文內容。無論是怪獸家長上身或是一時技癢，也不應過多地教授課本內容，否則小朋友會失了興趣，也使他們日後上課時因已學習內容而悶極。

 

以上只是我們盡力，在事前為大仔的心理上做些準備。而面對「我．唔．返！」三個鏗鏘的字眼，我回了個微笑，蹲下來：「尋晩已經講好，爸爸今日同你一齊返。我返工，你返學。」

 

大仔因為真的答應了，有點軟化。情緒稍有緩和，但一籮藉口隨之而來：「但係我唔想返學喎……」

 

我：「點解唔想返學呀？」

大仔：「因為校車好嘈……我唔鍾意嘈喎。」（藉口！）

我：「爸爸可以叫小朋友靜啲，一齊靜啲。」

大仔：「但係校車好搖，我又唔鍾意搖喎。」（另一個藉口！）

我：「爸爸可以叫司機叔叔開車慢啲，搖少啲。」

大仔：「但係同學仔同司機叔叔未必聽爸爸講喎。」（你又啱！）

我唯有轉話題：「記得上次去活動，同學W送了零食比你，你話要返學親自多謝佢喎。」

大仔：「唔，其實呢……我覺得佢今日都唔會返學囉……」（！）

好！再轉話題：「如果爸爸同你一齊返學吖？」

大仔：「爸爸你唔使返工咩？」（！！）

 

其實小朋友也很清楚知道他們一定要上學，但扭計是他們的強項，此時耐性比任何方法來得有效。老婆目睹整個過程，事後說我無聊，但我卻很享受這樣的父子互動，對答也有助他邏輯思考的發展。

 

正當我和大仔陷入「千日戰爭」的無止境對談，並樂在其中之時，媽媽一句：「爸爸唔好講啦，你早餐嘅蛋已經準備好啦，你去食啦。」

 

「哦。」我無奈收手，對大仔說「我真係要返工啦」然後轉身離開。但由於大仔已經由扭計懶床轉成嘻哈對話，情緒平靜了，加上用他最愛的蛋做招徠，他居然默默地落床，乖乖去換衫食蛋，然後若無其事地返學。

 

上課時間開始後，翻閱家長群組的對話，發現類似的攻防戰，並非毒男家獨有，其他小朋友，原來也和爸媽來個新年見面禮，在友誼賽中互相角力一番。

 

在此希望大家有一個豐盛的 2017，透過不同的互動和子女的關係更上一層樓！