Feature Image

又係我YO媽同大家傾下澳洲大不同,今次就同大家講下去到澳洲幫小朋友搵學校會遇到咩問題!各位初來到澳洲最緊張一定會係幫小朋友搵學校,其實好多國家都同香港好相似,會有學校成績排名,上網一查就知道間學校成績係點。而成績排名一向都係我哋做家長最關心嘅,唔好以為去到外國成績唔緊要,唔係淨係香港有怪獸家長,澳洲都有㗎!

更多文章:【幾個移民媽】澳洲睇樓買樓大不同 移民專家:三個重點要留意

以西澳柏斯為例,一般學校由KINDY到YEAR 12,一般都會入讀本區公立學校,方便接送。但係每區學校成績都有排名同分數,所以大部分家長會選擇居住學校排名較高、成績較好嘅學校區。呢邊唔似香港,比較簡單,如果有間排名第一、100分嘅學校,你住嗰區就自然可以入讀,所以好校區搵樓係比較困難,而且價格都一定唔會平!例如普通校區4房2車房,平均3000呎,澳幣要$500,000左右;但同一間屋喺好嘅校區就要澳幣$900,000以上,而且市場選擇唔多!

更多文章:澳洲樓價

剛剛到澳洲嘅朋友仔,可能會選擇租屋。其實如果租屋都可以入讀本區學校,一般學校會要求提供租約同水電費單去証明你真係入住,想好似香港咁租地址就應該無咩可能,因為好嘅學校對入學收生要求好嚴格,各位朋友仔要留意!

更多文章:【幾個移民媽】國際學校淨土不再 移民尋出路?移美港媽:慎選學校

講完公立學校,就講吓私立學校,大部份私立學校其實都好受歡迎,因為學費唔會太貴,門檻比較低,而且各方面配套的確比較完善。以西澳中學排名為例,除咗排名第一嘅係公立學校,之後十名都係私立學校。學費方面由澳幣$2,000至 $30,000不等,各位有興趣了解學校嘅家長可以預約參觀學校,了解一下每間學校對學生嘅要求,有些學校著重音樂;有些學校著重運動,成績優秀嘅學生都可以考獎學金入讀心儀嘅私立學校。

雖然私立學校受歡迎,但係排名高嘅私立學校都唔一定想入就入,出名嘅學校定期會安排家長參觀,入面嘅設施配套同香港嘅大學一樣咁靚,可能由4歲排隊到8歲都未必能入讀,所以有興趣入讀嘅家長真係要預早計劃定,入定申請表。

更多文章:【幾個移民媽】香港飲食文化在澳洲 移民媽:活海鮮應有盡有!

利安環球物業創辦人及執行董事張肇麒(Terence)建議,家長在挑選學校時應先了解子女的興趣,再考慮學校排名。有些學校以運動為招徠;亦有些學校以音樂培訓為主,運動項目為次,家長應先以子女的興趣為先,以免小朋友讀書時過於吃力。家長可以從學校官網,甚至參觀學校時了解到校方側重的發展方向,「你見到體育館好先進,好多設備,你就會知道佢係體育『谷』得好勁;見到演奏廳好靚,就會判斷到學校著重音樂發展」。

另外,有家長會為小朋友降低入校年級,讓小朋友能較易適應。Terence笑言,當年媽媽為他降低了半個年級,讓他可以認識新朋友,又可以減少學業上的壓力,更可以增進語言水平,「有時都唔可以淨係諗住讀書」。

 

【編按:以上內容為作者之個人意見及立場】