由停課到開學，然後又提早放暑假，呢個學年家長嘅心情就好似坐過山車咁！近日新冠肺炎疫情嚴峻，確診人數屢創新高⋯⋯不禁諗，9月開學應該都凍過水囉⋯⋯原來好多媽媽都有咁嘅諗法，紛紛喺Forum吐苦水：

「就算好彩復到課都可能返半晝」
「我已經預左開唔到，趁wfh自己屋企教啲先」
「佢敢開都未必夠膽返啦..」
「有教師中招，點開學 」

熱門討論：而家咁9月都唔知開唔開到課

一眾媽媽都猜測9月復課無望，困獸鬥唔知要持續幾耐⋯⋯如果又沿用網上教學方式，都好擔心影響小朋友視力。老實講網上教學都係睇住個Mon，小朋友都集中唔到，更加冇晒同同學嘅社交。

好多人都會話：成世人流流長，返少一年學又點？咁當然啦，做媽媽嘅一定唔會想小朋友冒險返學，就算學校肯開都未必敢返！只係呢段時間實在難捱⋯⋯唯有圍吓爐呻吓囉～

熱門討論：求救!我有親子溝通問題!點算

唔少家長都會選擇自食其力，盡自己所能幫小朋友補吓習，令佢哋不至於成個學年都空白咗。有網民媽媽喺屋企教囡囡數學，點知囡囡唔單止唔肯聽，仲覺得媽媽會教錯！搞到網民媽媽好激心，仲忍唔住手責罰囡囡⋯⋯

估唔到想教吓小朋友，又會引發親子間矛盾，真係左右做人難呀～

P.S. 呻完，總之都係健康最緊要～我就覺得順其自然啦，今年全世界都受影響，好多嘢都急唔嚟。

各位媽媽撐住呀！