自從開始幫阿仔準備K1面試，真係每日都學識好多嘢。首先成日聽人講細B、細B，呢刻終於感受到咩叫細B輸蝕啲。先唔好講能力，就淨係講報名，PN班有啲學校唔收細B表都明白，始終叻唔叻都好，學額緊張嘅學校無理由收少幾個月學費等你，為免浪費大家時間，唔收都好合理。

但去到K1，其實所有小朋友都可以正常入學，教育本身唔係有教無類咩？點解年尾出世就連面試機會都無，強迫人做大B，當然你可以話唔鐘意咪唔好讀囉，但依家我就係鐘意讀唔到，又當然玩遊戲要跟遊戲規則，但有時都會唔開心，會諗係咪自己生小朋友唔夠計劃，係咪細B就唔可以讀名幼、神幼？

講到呢度......其實你又發現都唔係嘅間間名幼、神幼唔預你玩，面試一切都係睇小朋友表現同能力（另外，睇家長、背景！？），不過要同超大B、大B爭，實際差成年，喺呢個一日已經由講單字變成講短句嘅階段，真係極級緊張，精神狀態完完全全放鬆唔到，絕對可以秒成焦慮症；講到面試表現（終於講到...），其實依家啲小朋友10個差不多9.5個有返開Playgroup或者學前班，以我觀察，同之前睇forum同面試攻略報道好唔同，實際真係無乜小朋友會失控同大喊，個個都乖乖豬、坐定定，就算怕羞唔講嘢都有眼神接觸，講到做task，就更加係厲害啦，睇forum真係個個小朋友都做到...

而去到最謎思嘅係......其實無人知學校收生標準，做唔到、唔講嘢而被錄取大有人在，完全同買六合彩一樣，睇老師心情、睇見果個老師點諗，經歷咗仿似3年零8個月之後，原來最後都係佛系心態就可以......

呢刻只係希望唔使食全餐，全部waiting要寫求位信，將呢份忐忑延長到6、7、8、9月啦！