話說爸爸好多時都會同Timtam仔講道理，Timtam仔似懂非懂咁聽，我成日都懷疑只有歲半的Timtam仔係咪真係聽得明!

前日發生左件事，好想分享一下！

前日我同Timtam仔打算坐巴士去婆婆家玩，我拎左一個大媽媽袋（你明有多重），再加一袋食物回娘家，兩個膊頭各掛一個大袋！

拖住Timtam仔出左門口，係走廊走左幾步，佢就開始扭抱、大喊、唔行！佢平時都係咁，我唸起朋友叫我要狠心d，訓練佢行多d，今次就堅持唔抱佢，我自己先走去lift口禁lift!

回頭望望佢仍然企係原地，不忿咁望住我，個樣話我知: 唔抱我! 我就唔行!

我話：好喇！有lift喇！再唔行過黎，媽媽走喇！

冇反應！

因為我企係lift口位置佢睇唔到我，我就話：好啦！媽媽走喇！bye bye!

仍然冇反應！

佢聽到lift門關上之後，先即刻跑過黎搵我，佢笑住好似同我玩捉迷藏咁捉住我對腳，真係唔知好嬲定好笑！

入左lift，我終於嘗試同佢講道理！

我板起塊臉：媽媽今日拎住好多野，抱唔到BB！你睇！媽媽拎住兩個袋好重，你拎下有幾重！

我真係將個袋比佢拎下！

BB：…

認真mode : 係咪好重！媽媽抱唔到BB，BB自己行，媽媽去到巴士站再抱抱你，好唔好？

BB : (似懂非懂望住我…）

出左lift，平時的佢就會扭抱，佢今次真係冇喎！

拖住佢行多一段路，我再讚下佢：BB拖住媽媽行好叻喎！媽媽去到巴士站就會抱BB喇！

終於……第一次成功拖住手行完全程路！

到底佢真係聽得明我講野，定只係一時興起想自己行呢？

不過自個次之後，我開始嘗試每件事，都同佢講原因，點解唔可以做，點解會危險，我相信溫柔而堅定的育兒法，沒有捷徑，只能靠耐性！

*~*~*~*~*~*~*~*~*~*~*~*~*~*~*~*~*

Facebook: Timtam仔的成長日誌

*~*~*~*~*~*~*~*~*~*~*~*~*~*~*~*~*