幼稚園K1升讀小學一年級係人生其中一個重要嘅轉捩點，由日日無憂無慮玩遊戲，突然變成日日都要坐定定做功課，對小朋友嚟講都咪話唔大打擊，所以一定需要時間同埋家長嘅幫忙，先可以好好適應。開學到而家個幾月，唔知各位小一生同埋家長適應好未？

有仔女啱啱升讀小一嘅家長喺討論區留言表示，開學到而家喺幫小朋友適應方面遇到兩個問題，一係「默書溫極都係唔合格」，二係「樣樣功課都要逐題解釋」，樓主話因為呢兩個小一適應嘅問題，搞到日日都好勞氣好想鬧小朋友！

綜合咗眾多留言，以下三點，係仔女升小一嘅父母一定要知嘅：

1. 小一適應期係必經階段

好多過來人家長都話小一開學多甩漏係「必經階段」、「正常不過」，始終「6歲人仔要做到準確係好難，大人都會唔覺意寫錯」，而且除咗小一，「中一都係令人挫敗的階段」，所以樓主遇到嘅情況屬於「正常，唔洗勞氣」！

亦有網民指出，開學到而家只係個幾月，家長不妨俾多啲時間小朋友，只要過多一段時間適應咗，掌握咗技巧就自然會有進步。當然，家長要了解小朋友嘅難處，盡量幫佢適應，同埋唔好過份強迫佢哋，始終每個小朋友嘅節奏唔一樣，有啲小朋友小一下學期就已經完全適應，但有啲小朋友可能小二先適應，要慢慢嚟，唔急得！

2. 家長要有無限耐性

有唔少網民都話，自己小朋友小一嘅時候，內心都成日好勞氣好想鬧小朋友，但明白佢真係有努力過，所以死忍忍忍忍住唔想發洩喺小朋友身上，唔想打擊佢哋嘅自信心，千祈唔好講「乜你咁都唔識？」、「幼稚園咪教過囉？」呢類說話！

有家長分享自己嘅方法，就係「由幼稚園時期，已經教佢睇題目，初期我會教佢一齊讀，後期叫佢自己讀，所以小一已經識自己睇全份卷既題目，唔需要人教。」不過，當然都要睇返小朋友嘅性格特點，再用返相應嘅方法去教佢哋，講到尾，「小朋友係要俾耐性去等待佢哋成長，初小成績完全唔影響任何嘢，除非想轉校啦！」初小嘅成績真係唔代表啲咩，各位家長唔使太介懷！

3. 最緊要係小朋友有努力過！

留言入面好多經歷過小一嘅家長都建議，小一階段唔好俾太大壓力小朋友，即使默書唔合格都唔緊要，最緊要係小朋友有冇努力過！「你諗吓，佢哋由幼稚園升上來，要適應全新環境，學習新嘅規距，學習全新嘅上課模式，仲要冇得瞓晏覺，其實佢哋都好辛苦，放學仲要上課外活動，返屋企仲要做功課……做大人叫你狂加班都辛苦，更何況6歲人仔，唔好俾太大壓力佢，呢段時間係俾佢愛上學習，建立自信，只要鍾意，佢哋就會自動波。」

「我自己覺得，如果教過佢，又會問返佢係佢識答，我就算，……當然佢默完返黎分數未必會合格，但係我眼見佢為默書努力過，我都唔會鬧佢，同佢講，媽咪見到你努力過，唔合格失手，唔緊要，我地下次再努力啦！」

所以，各位小一學生嘅家長，如果你嘅仔女仲未適應開學生活，絕對唔使灰心，俾多啲耐性同鼓勵，慢慢小朋友就會適應到架喇！

Click入嚟睇更多家長心得～