先唔好講到咁深，最簡單，由小學三年級嘅英文教科書講起。想當年，我仲未去英國，打開嗰本我唔敢開出版社名嘅教科書嘅某個chapter，教「職業」。就喺嗰一課，我學識一個字，叫做barber。根據書中圖片所示，有個男人幫個女人剪緊頭髮。去到英國先知，教科書唔單止教錯，簡直仲侮辱咗 barber 呢個職業。

Barber剪嘅係頭髮，hairstylist 剪嘅都係頭髮，兩者有咩分別？Hairstylist既剪男也剪女，barber 卻只招待男賓，barber這個字便是鬍子「beard」的拉丁文。男人的浪漫，豈止一碟豆腐火腩飯；人一世物一世，係男人嘅，點都要幫襯一次barber shop。

通常走入一間salon，你一定會聞到好強烈嘅化學藥水味，因為裏面嘅服務實在太多元化，電髮染髮負離子應有盡有；一間barber shop卻簡單得多，剃鬚剪髮，講完，所以你喺一間barber shop裏面只會聞到一種味，就係男人味。

紐西蘭最近便有一名女士嘗試到一店理髮而被拒諸門外，網上有人評擊店主性別歧視，但店主一於少理，只說：「男人只需要一個地方to get a haircut，have a beer and discuss and chat freely and openly。」誠然，這是性別歧視的極致，為的卻只是要守護一陣佬味。

正如這位紐西蘭理髮店老闆說，一家最「佬」的barber shop是有免費啤酒供應的。一邊聽著電剷在震動，一邊喝著冰凍的Stella，女士又怎會明白這種快感。

香港的barber shop有沒有啤酒供應？大大話話光顧過的barber shop都有三、四家，不是每家都有啤酒，例如文華酒店內的Mandarin Barber。由裝潢到音樂，Mandarin Barber走的都是文華一貫的路線，雖沒啤酒供應，但那杯咖啡果真是六星級水準。

不過，我這個年紀就是還未懂得欣賞文華的貴氣，因為文華裏面的師傅也太過斯文了，紋身都冇個。冇錯，雖未至於是一個條件，但10個有9個barber都是有紋身的，仲要唔係求其紋兩隻字咁少嘢，閒閒哋半隻手臂都係公仔。

女人可唔可以去barber shop剪頭髮？理論上可以，但hairstylist和barber的最大分別便是，前者以剪為主，後者以剷為主；所以一位hairstylist的主要工具是剪刀，而barber的重點武器是剃刀。就算女士要剪一頭短髮，也甚少是短到要剷這個地步，所以一般而言，女士是不會光顧barber shop的。

當然，剷還剷，絕對不是沒頭沒腦的亂剷，因為剷也要剷得有層次，要看得出剷的漸變效果，而這下漸變，便是英文的fade，也就是飛髮個「飛」了。

2011年，倫敦Mayfair有家高級barber shop便在香港設立分店，而當時在香港的barber shop不多。據聞，他們當年這個決定，便是因為看了周柏豪那個新髮型，發覺原來香港人都「飛」得起。