你是否經常和子女因為擦功課的事而爭吵？

一年前，當時正就讀低班的女兒開始有寫字功課。一向字體端正的老婆好用心的坐在女兒旁邊，看著剛學用筆寫字的女兒做功課。最初，每當阿女寫完一隻字，老婆便即時指出這個字寫得不夠好的地方：「條線唔夠直喎！」、「點解呢一筆出左界嘅？」、「呢個字點解寫到咁高嘅？」

說時遲，那時快，老婆已經手執擦膠，準備好將剛寫好的字擦走：「我覺得你可以寫得再靚啲，我幫你擦咗個字等你再寫。」她隨即就會把字擦得一乾二淨。阿女看著自己辛辛苦苦寫出來的字被擦走，心裡非常難受。而當老婆擦了一個又一個字、阿女便開始對寫字失去了專注和耐性，本來她會慢慢地寫好每一筆，但現在她只求快快寫完。

老婆當然也察覺到阿女的心態上的轉變，但她仍有自己的堅持，認為「咁佢真係寫唔好呀嘛，緊係要再寫過喇。我哋唔可以咁求其架。」最後阿女情緒大爆發，並哭著說：「我唔鍾意你擦我啲字！我都無寫得唔好！你唔好再擦喇！」

事後老婆明白阿女對此很反感，亦知道如果大家繼續「企硬」，每天的功課也會變爭吵的導火線。所以她嘗試用「給選擇」的方式來繼續維持自己的原則，既然阿女說「我唔鍾意你擦」，那就叫阿女自己擦。

另一晚，在她指出阿女那個字須要改後，便拿起擦膠問阿女：「你想你擦定我擦？」阿女只能一臉無奈，心裡可能覺得：「有分別咩？」最後她都會不情願地讓媽媽代勞：「咁你幫我擦喇！」久而久之，阿女便對「阿媽陪做功課」反感，每當老婆行近她時，她就會用手把字遮蓋。

有見及此，老婆唯有再「退一步」：「不如每次你完功課，你揀兩個你覺得可以再寫靚啲嘅字，我再幫你擦喇！」阿女雖然萬般不願，但也只能無奈接受。自此，她就會在做完功課後叫老婆來檢查，然後擦掉兩隻字再重寫。

雖然阿女沒有再像最初一樣大哭大鬧，但我看得出每次媽媽擦走她的字時，其實她並不願意，亦未必認同該字需要重寫。而「每次只擦兩個字」的規定亦缺乏彈性，如果阿女「識玩」，她大可以求其寫很多個不合格的字，而當中就只有兩個字要重寫。而更重要的是，阿女寫字的水平沒有進步。

其實這樣的處理方法是治標不治本，但我們又應該怎樣做呢？