今日大肥豬又同小小豬做啲小訓練，今次依個小訓練都係集中訓練專注力同耐性。

小小豬嘅專注力同耐性一向比較弱，做事好多都係得三分鐘熱度，雖然我地已經有請姑娘為小小豬做啲訓練，不過一星期只有一堂，所以平日我地都會做啲小訓練嚟加強，希望可以改善啦！

為咗平日同小小豬訓練，大肥豬都成日上網參考吓啲訓練遊戲，今日就係屋企搵咗啲工具同小小豬玩分糖糖遊戲，等喺分糖糖過程，佢可以專心又有耐性！

其實啲材料都好簡易都可以話係廢物利用，除咗主角啲糖係朋友仔送之外，其他嘅都係小小豬細細個用嚟開奶用嘅用品。

 

其實都真係好易做，只要將不同顏色嘅糖糖分喺唔同嘅蓋度。小小豬都好專心，慢慢咁做。

 

 

小小豬嘅表現都唔錯，越做就越有信心。

 

 

經過一段努力，小小豬好乖仔咁完全分晒啦！

 

坦白講，分糖糖都係啲好簡單嘅遊戲，係唔係真係對專注力及耐性有好大改善我真係唔敢講。不過，我相信唔多唔少都有幫助，起碼小小豬都知道要完全分晒先可以玩其他遊戲，做嘅時候又好專心，所以對小小豬嚟講都有啲成效。