「考試先黎病，唔通連個天都唔鍾意我！」我自己就未試過，但見到有討論區網民話小朋友考升中呈分試先病，醫生要小朋友休息兩天，呢位網民自己贊成架！不過家人就覺得呈分試重要…如果發生喺自己小朋友身上，都真係好難做啊…
我見討論區其他網民畀嘅意見都好一致，大家都認為一定係小朋友健康行先，考試次要。最怕小朋友病住夾硬溫書，記唔到入腦，表現失準咪仲衰！仲有平時課堂表現都計分，唔會一個考試定成敗，不如好好休息等補考好過啦！
但要留意，如其他網民提供嘅意見所講，並唔係每一間學校都有補考制度，加上補考後的分數有機會打折，所以如果真係要喺考試當日請假，都建議問返校方補考安排夠穩陣啊！不過更加重要，係問下小朋友嘅意願，同佢好好商量，再同校方溝通，就可以搵到最適合嘅安排。
病起上黎真係無人想，仲要撞到正考試呢啲「非常時期」，希望呢位網民嘅小朋友快啲好返，早日重返試場！各位大朋友自己都要保重身體，精精神神陪住仔女打呈分試呢場硬仗啊！
【編按：以上內容為作者之個人意見及立場】
