我都記得兩個仔幼稚園時成日要整呢樣整嗰樣交功課，尤其係中秋一定要整燈籠。老實講都幾麻煩架，最後咪九成都出自我手～forum有人講話，老師要家長同小朋友一齊整小遊戲。有啲家長摺吓紙彈弓咁，但有家長好堅咁整咗一台彈珠機出嚟，係呀你冇睇錯係彈珠機！原post冇出圖，唔知係唔係我想像中嗰種啦，但都覺好鬼勁！最搞笑係老師叫個個下星期都交彈珠機返嚟啦，嗱，可以交可以唔交架。
我覺得又唔可以怪彈珠機家長做爛市嘅。原本整呢啲嘢都係有粥食粥，有飯食飯。家長有心機細路又合作嘅，咪整得精美啲；冇咁多時間精力嘅，咪簡簡單單整happy吓囉。而家統一咗個「標準」，搞到個個都要整得咁複雜，變相要家長OT拆掂佢嘅啫。
整唔係問題，做之前諗諗究竟意義所在先啦。講真，做手工時一個兩歲細路幫到咩手？如果個阿媽認真過頭，分分鐘叫個鈿路行開一二邊，唔好搞破壞添呀。如果係咁，唔只同親子沾不上邊，直頭係背道而馳。
有網民話中秋節幼稚園整燈籠時，老公講咗句：「嘩，個個屋企都係做紙紥架？」可想而知，啲燈籠有幾咁精緻啦。都係嗰句，同小朋友一邊增進感情，一邊親身體驗節日文化係好事嚟喎，不過變咗要威要盛就無謂啦。我寧願細路拎住個蠢蠢地充滿童趣嘅成品返學，都唔好一睇就知係家長整咁款。
【編按：以上內容為作者之個人意見及立場】
{"PROD":"ek","CHANNEL":"\u6559\u80b2\u738b\u570b","SECTION":"article_detail","CAT":"\u5e7c\u5152\u6559\u80b2","SUBCAT":"","SUBSUBCAT":"","SITE":"image.edu-kingdom.com","CONTENT":"C","L":"TC","UID":0,"PLATFORM":"web","TITLE":"\u5e7c\u7a1a\u5712\u89aa\u5b50\u624b\u5de5\uff0c\u5bb6\u9577\u70ba\u8981\u5a01\u505a\u721b\u5e02\uff1f","CID":112793,"PUBDATE":"20181018","AUTH":"\u98db\u5929\u4e2d\u5973Juicy\u5abd","KY":[],"SOURCE":""}