平日出街見到一啲喺公眾地方大聲喧嘩、完全不受控制嘅小朋友，可能大家都會忍唔住睥佢哋兩眼，但假如佢哋係你嘅仔女，你又會有咩感受？社會上有一班有特殊教育需要嘅SEN學童，佢哋嘅父母無時無刻都承受住沉重嘅壓力，有位媽媽就喺討論區度訴苦，講述佢照顧患有自閉症嘅11歲仔時所面對嘅種種辛酸⋯⋯
討論區熱話：呢個仔真係湊得好辛苦
樓主以「呢個仔真係湊得好辛苦」為題開Post，分享有次一家人出街食飯，患有自閉症嘅11歲囝囝突然喺大庭廣眾下大嗌、周圍搞人哋啲嘢，甚至爬上人哋啲車，幾經辛苦行完一段路之後，阿仔話要食糖水，點知入到舖頭又嗌又瞓地，仲話要自己走，樓主老公就更加講晦氣說話：「得啦，佢大個啦，佢正常架，冇問題，自己返屋企得啦。」樓主當然覺得咁樣會好危險，於是追咗出去睇住阿仔。樓主覺得，好地地一家人食餐飯但結果搞成咁，真係好辛苦。
睇見樓主又要擔心阿仔有危險，又要驚阿仔騷擾到其他人，同時仲要面對途人投以奇異目光，但老公又完全唔體諒，真係戥佢覺得陰公！而且睇嚟樓主嘅老公唔太識得處理呢啲情況，甚至唔太想面對阿仔有自閉症呢件事，所以令樓主更加感到心力交瘁。
好多網民見到樓主嘅苦況，都紛紛留言鼓勵：「加油呀媽媽，辛苦時上來訴說一下」、「你是一個好媽媽，兒子會感覺到的」、「相信自己同仔仔，佢會慢慢有進步架」，真係睇到心頭一陣陣暖意湧上嚟，大家都好用心鼓勵樓主！
同路人分享照顧SEN的有效方法
留言當中亦有唔少家長表示同樓主一樣仔女有SEN嘅問題，對樓主嘅經歷感同身受：「我兩個仔都係A仔（自閉症患者）……只係兩日已不停考驗我EQ，人都癲」、「我為咗佢唔知喊咗幾多次，每日都同屋企人吵吵鬧鬧，真係好攰」。
幾位同路人分享咗幾個照顧SEN學童嘅方法，有人提出可以用字卡、扭計骰或者睇書等方法幫助小朋友平復情緒冷靜落嚟，亦有人話可以畀SEN學童學習跆拳道、滾軸溜冰等運動，一嚟可以畀小朋友「放電」，二嚟又可以借第三者同埋朋輩壓力嚟培養小朋友習慣聽指令、守紀律。
SEN家庭需要社會大眾放下有色眼鏡
其實無論仔女係幾咁難湊，作為家長都會不離不棄，幾辛苦幾攰都會硬着頭皮頂硬上，但奈何社會上依然有好多人唔識體諒有SEN問題嘅小朋友同埋佢哋嘅家長，除咗會好明顯咁擺出一副鄙視嘅神情，甚至會大大聲喺SEN家長面前講「冇家教」、「做人父母要控制佢架嘛」呢類完全冇同理心嘅說話，簡直係一刀刀插在SEN家長嘅心上。
世上冇人希望自己小朋友有SEN問題，一班SEN父母已經好盡力咁去教小朋友，佢哋付出嘅心力同時間甚至可以話比正常兒童嘅父母仲要多好幾倍，旁人根本冇資格批評佢哋唔識教、冇用心教！
而且SEN唔係咩會傳染嘅病毒，SEN小朋友都需要面對世界，喺日常生活中一步步咁成長，只係佢哋學得比較慢，又或者學嘅方式比較唔一樣，「自閉嘅小朋友有時睇起嚟係好激動，但唔係真係有太大殺傷力，其實佢哋内心好單純善良，無意傷人」。
SEN家庭真係好需要社會大眾嘅體諒同包容，希望大家多啲同理心，即使實際上幫唔到啲咩，但最起碼都唔好用歧視、厭惡嘅目光去看待佢哋，又或者有機會就行埋去同佢哋講聲「加油」，一齊建立真正共融嘅社會！
