每年到要填報升中統一派位表格時，不少家長都會問，到底該如何填好呢？填表前，家長最重要知道，小朋友大概是屬於那個派位組別，然後，謹記以下一點派位原則：統一派位時，完成每一派位組別所有學生的派位，再為下一組別學生進行派位。
即是說，就算有B1組別學生乙30都派唔到，或派位表作廢，EDB也會先為他們安排學位，才再為B2組別學生派位。
呢一點好多人都知，但為何還要強調呢？
好簡單，因為大多數人都只係“知道”，而沒有認真去理解呢一點既重要性。
其實不論在那一個校網，不論那一個派位組別既學生，填表都需要謹記一個策略：
必須盡填名單中所有本區和他區同水平既學校，再加至少三間次一水平既學校
今次先為大家解答第一個常見疑團：
在B1學額充足的地區，B1學生也只派到B2中學，是否派位系統出錯？
九龍城KL3一向出名B1學位充足，但偶然也會聽聞，有B1學生派唔到B1中學，點解呢？
其中一個情況可能係咁，該學生既統一派位表排序大致如下：
乙1：華英，乙2 旅港，乙3 銀禧 ...... 乙10丘佐榮,乙11何文田官立
最後派入了何文田官立，點解呢？唔係話B1學位夠，最差都只係入丘中嗎？
其實主要原因，就係因為家長 沒有在派位表上盡填所有可選既B1中學
- A) 原因1：錯誤理解B1學位足夠既意思
校網有否足夠B1中學學位，係以本區和所有他區B1中學學位，對照區內B1人數去估計。所以就算所謂有足夠B1中學學位，實際係指＂本區和他區＂全部B1學額一起計算。所以如果只填本區B1中學，或只填部份B1中學，實際機會係會低咗，自然會由 夠位變為不夠位。
- B) 原因2：對手選擇的影響
統一派位，除了運氣外，從來都係一個搏奕遊戲，你永遠無法估計對手既選擇，但你既機會，會隨著對手既選擇而改變。
參考以上案例，假如當年大部份學生家長，都採用保守策略，把丘佐榮放在乙7/8，咁如你放乙10，自然唔會再有機會入到。
但如按照建議，把其餘本區和他區B1中學都放在丘佐榮後，才放何文田官立，相信最後不會派入何文田官立，而是入了他區B1中學。
就算在所謂B1學額充足既地區，如你堅持只想入讀本區B1中學而不填他區B1中學，最差的情況，你是否接受 最後只入讀本區B2中學而不入讀他區B1中學，家長要自己衡量。
我又再試吓用另一方式去解釋
假設現在有3款水果：士多啤梨，蘋果，橙，每款水果各有4份，另外再有20杯水。
士多啤梨：4
蘋果：4
橙：4
水：20
依家有10個小朋友，每人可取得以上4款物品其中一樣，不過要抽。小朋友要按自己喜好，填上想要既物品次序，然後再按抽籤次序分配。
排好小朋友優先選擇物品次序後，會再按照大家各選擇次序一一分配物品。
理論上，有12份水果得10個小朋友，每個小朋友都應該可以抽到一份水果，但現實會點呢？
如果其中兩位小朋友，小明同小強係物品次序表上，分別填上以下選擇：
小明既選擇次序：
（1）橙，（2）蘋果，（3）水
小強既選擇次序：
（1）橙，（2）蘋果，（3）士多啤梨，（4）水
不過，小明同小強都唔好彩, 抽籤後被安排第9和第10位去選物品既小朋友。
而且優先次序在他們之前的小朋友，有8個小朋友係選擇了（1）橙，（2）蘋果。
結果會點呢?
小明只係得到水一杯，小強會得到士多啤梨一份。
點解水果夠分，但小明都分唔到，而小強係最後先選物品，又反而可以分到士多啤梨呢？
如果大家明白呢個例子，就知點解我話要盡填所有同一派位組別學校既重要性。
即刻Click入討論區一齊傾（【升中統一派位填表策略簡述】）
(本文獲教育王國會員hkpapa852授權轉載)
相關文章：
【升中統一派位策略(二)】地區Band1學額不足 如何搏「執雞」？
