今日我返學校參加小一入學分享會，幫手做義工上台同大家分享幾句。當提到升小一要注意嘅一啲小事情，見在場家長反應都唔錯，所以想喺呢度同大家分享下一啲小經驗。

知道各位偉大嘅媽媽都已經準備好晒開學用品，文具、校服、水樽等一切所需。但有啲小小嘅校內情況可能各位小一媽媽未必知道嘅。

首先講下自理問題：

去洗手間

好多同學仔幼稚園時去排洗一定有老師同姨姨跟住，幫手洗手，沖廁。但小學係唔會有姨姨幫手㗎！所以各位媽媽一定要教識小朋友點樣去洗手間。

女孩子最令我擔心就係要坐座廁。媽媽們都一定明白。個個都係小朋友，未必會識得用到廁所好乾淨。經常有廁板濕晒嘅情況。所以我會叫個囡盡量用蹲廁！因為出街媽媽們會幫手清潔好。但叫小朋友自己清潔真係好唔放心。所以如果學校有蹲廁就叫阿囡盡量用啦！

男孩子方便好多，但聽過好多情況，小朋友唔識拉褲鍊。或者拉得唔好，夾住件衫甚至其他更尷尬嘅都聽過。大家唔好笑呀！真係聽過唔少㗎！因為幼稚園通常係橡筋褲頭。所以佢地唔識都唔出奇！

另外講下小息。有好多媽媽都擔心小朋友返到學校唔夠飽，會帶好多零食俾佢地小息食。但小朋友放學仲係好似成日冇食飯咁，話好肚餓。跟住又會諗，係咪啲野食俾人搶晒呀？ 係咪學校唔夠飯俾你食呀？ 當然呢啲情況唔可以話冇機會出現，但以我了解，最大原因反而係帶得零食太多！點解？ 其實好簡單，小朋友小息時食左咁多零食，到午餐時間咪食少左飯囉，到放學自然就超餓啦！當家長見到佢地咁餓，就問佢地係咪午餐唔夠飽。單純又天真嘅小一生，通常都只會簡單答你：「係呀！」而唔會好詳細咁話你知其實佢小息食太多所以午餐食唔落㗎嘛！（媽媽，呢點你懂的！）

另外有一點都好想同各位家長分享。除左擔心佢餓所以帶零食之外。知道好多家長都好想小朋友可以快啲同同學仔打好關係。所以會準備多啲零食俾佢地同小朋友分享。學習分享當然係好事啦，但如果「分享」拿捏得唔好。就反而變左帶零食返學校「收買」朋友。呢個情況經常發生。除左聽過好多唔同學校媽媽們分享之外。我自己都見過。有啲小朋友日日攞住一大袋糖果（目測2磅左右）唔係「請」同學食。而係有要求嘅條件交換。當然小朋友嘅世界仲未知呢個事情嘅嚴重性啦！但如果要用食物去交換友情，大家覺得呢啲係「友情」嗎？而小朋友會為左粒糖聽指令，咁慢慢又會變成點？結果留俾大家想像。

另外就係小一經常聽到嘅係：「今日阿邊個搶左我啲野食」「今日突然冇人同我玩我好唔開心」好多時源頭其實都係因為媽媽們一開始俾好多零食小朋友。到後來慢慢覺得日日咁帶幾十蚊野唔係辦法。或者覺得應該都「買」夠朋友。突然帶少左零食就會有咁嘅後果...請三思！

所以成日都話小朋友嘅世界，大人盡量唔好介入太多，其實佢地有自己最單純嘅交朋友方式。請唔好令佢地嘅純真世界咁快變質。

費事太長氣?希望大家唔好介意我分享呢啲咁微不足道嘅小事啦⋯⋯

祝各位小一新生可以日日開開心心上學去。

各位有升小一嘅問題都可以去我Facebook Page 一齊交流一下㗎☺️