一年一度嘅「幼稚園面試黃金週」即將又要殺到，對於幫定咩連續報咗兩年幼稚園嘅我，到咗呢個「黃金週」，印象同感覺確係特別深刻；望住身邊嘅朋友仔，陸陸續續要幫仔女報名兼準備面試，真係咩回憶都返晒嚟！而望返轉頭，有時覺得好多嘢，其實都唔到你揀！
「Why not both？ 」
由於定咩係12月生日，所以決定報咩幼稚園之前，首先要諗好應該比佢做「超細B」，同同年出世嘅小朋友齊齊返學，定遲一年入學做「超大B」，等佢唔會同其他同學年齡分野太大；望落好似好難揀？心儀學校又未必收超細B？面對種種考慮，最後得出嘅結果係：其實兩者之間都唔一定係個選擇嘅，本著報咗、見咗、有結果嘅方向，最係定咩都膽粗粗做咗「一年」超細B！
更多文章：【Trouble 2 好難搞】我都無體罰，點解你打人？
重讀上學分別大不同
按住原本「Why not both？ 」嘅決定，定咩亦以大B身份再考多次幼稚園，再加上面對疫情爆發全港停課，只有半個學期嘅K1生涯轉眼間就過去，所以喺多方考慮下都決定比佢轉校重讀K1。
回想起兩年間開學嘅比較，自己就好似對住兩個完全唔同嘅小朋友咁，由第一年成舊飯咁，自己開心同緊張過佢，變成今年識得期待返學，仲自己對住個書包逐樣「Check 」（當然如果佢係升K2，應該都會有呢個反應同對比），轉眼間真係覺得佢大個咗好多。
更多文章：在職媽媽的WFH日常：「對不起，媽媽的冷淡待慢了你！」
超大B就等於Ready要返學？
至於有人可能會擔心仔女太早返學，會唔習慣同父母分離，其實呢個問題，一開始我根本就無諗過要面對，以平日嘴招招嘅定咩，加上返學前班嘅表現，真係勢估唔到佢第一年開學，竟然喊足一個月......
咁又係咪代表大B就唔會喊？喺定咩身上，我驗證咗呢個並唔係事實，貫徹佢「撒嬌寶寶」嘅慣性，今年開學嘅頭幾日，佢依然係擺出喊樣，仲幾乎要典地咁濟，不過反而係作為媽媽嘅我，汲取咗去年嘅實戰經驗，深知其實轉個背佢就唔會喊，所以都學識「上學斷捨離」，以9秒9速度同佢講Byebye先至係最好嘅方法！
總括而言老土啲講，成日都話每個小朋友嘅成長階段都唔同，所以要幫仔女決定做超大B定超細B嘅時候，其實真係唔可以以歲數作為界定，學業生涯漫漫長路，最重要都係為仔女揀間適合嘅學校！
