2024-08-16

【假期後遺症】4個方法讓孩子收拾心情開心上學去！

距離開學日只剩餘兩個星期，各位家長，係時候要為小朋友做好心理調節，好好收拾心情上學！放完長假期，莫講話小朋友，就連大人都會出現「長假後遺症」嘅症狀，例如：不能專注、悶悶不樂，總之就係難以回歸有規律嘅生活軌道，而對於年紀輕輕嘅小朋友，就更需要盡早做好準備！

臨床心理學家黃詠詩就為大家提供以下幾個方法，可以提早為小朋友孩子收拾心情，準備上學嘅小方法，好讓佢哋更輕鬆應付開學日。

1.開始回復上學作息
一般小朋友喺放假嘅時候，作息時間都會同返學日子有所不同，比較常見嘅係放假時會較遲起身，亦會較遲睡覺。若果想為小朋友做好開學準備，可以安排喺兩個星期前逐漸調教佢嘅作息時間，好讓身心理都有足夠時間作出調節。

2.安排與學習相近嘅輕活動
有唔少父母都會趁住長假期帶小朋友出外遊玩，又或者為佢哋報讀不同類型嘅興趣班，與此同時，小朋友喺家中嘅自由活動時間都會增加，不過活動性質似乎就未必同返學相近，所以開學前，除咗要開始習慣早起早睡，仲可以喺呢個時候為小朋友安排一啲與學習相近嘅輕活動，例如：去圖書館一齊睇書等......

3.在家中回復時間表與規矩
臨床心理學家黃詠詩提到，曾經遇過一個家庭，因為小朋友平日都忙於學習同返學，所以根本無時間睇電視，於是喺暑假嘅時候，家長就放寬小朋友嘅睇電視時間，給予佢無限嘅自由度。
結果一開學嘅時候，孩子就成日「扭計」，唔比佢睇電視，就唔做功課；而事實上，暑假去到尾聲，作為父母可以慢慢幫小朋友調節時間表同活動，協助孩子適應開學後嘅生活。

4.開始準備新學年用品
最後，家長可以選擇同小朋友一起準備新學年要用嘅物品，等佢哋都有機會參與其中，從另一角度滲入將要返學嘅信息，好讓小朋友有心理準備，同時營造開心同令人期待嘅感覺。