最近有無家長發現自己子女唔單止喜歡事事講「唔要！」仲會動不動就發脾氣郁手打人？ 作為父母睇到真係好頭痕，擔心久而久之打人會變成佢哋嘅壞習慣，所以都想盡早教好。不過，糾正佢哋行為之前，應該要先了解下小孩動手打人嘅原因。

小朋友郁手郁腳4大原因

小孩嘅攻擊行為最常出現喺1歲半至3歲之間，呢個時候出現嘅踢人、打人、咬人或者亂掉嘢等行為，都唔見得係想有意傷害其他人。而係佢哋語言發展尚未成熟，有時嬲起上嚟又唔識解釋，就會郁手郁腳嚟表達不滿。 不過！如果閣下小朋友到咗5歲都無辦法控制自己、依然會亂打人，家長就要了解背後原因，必要時要諮詢專家意見，以下四個係最常見小朋友會郁手郁腳嘅原因。

原因一：興奮表現嘅打人
原因二：玩具被搶、地盤被侵略、嬲而打人
原因三：想與人互動，但唔識控制力度而打人
原因四：被忽略所以想引人注意而打人

更多文章：【教育方程式】鬧之前諗一諗！父母緊記8大要訣 教訓前問清理由

7招改善小朋友打人習慣

家長唔好因為小孩年紀細，就唔幫佢哋糾正行為。壞習慣一兩次就可以學識，而且唔理唔關注，日後只會更加難改善。好習慣就要持之以恆先可以養成，以下7大改善方法，可以供家長們參考一下：

1. 小孩犯錯要當下立即制止以及糾正，大人態度需一致，俾小孩知道呢種行為係唔容許。

2. 小孩如果情緒失控，可以帶佢先離開現場搵個人少嘅地方，雙方冷靜情緒後再溝通。了解事情來龍去脈同小孩諗法，嘗試給予正確觀念。例如同小朋友講：「雖然好想玩同一個玩具，下次可以將諗法講出嚟，同人講自己都想玩。可唔可以輪流玩呀？或者一齊玩？」

更多文章：【教育方程式】自信從「小事」萌芽 首要勿讚壞！5招助孩子建立自信心

3. 家長應帶小孩同被打的一方道歉，嘗試帶領小孩講出原因：「頭先因為爭玩具而打你，我唔應該咁做，對唔住。」讓小朋友知道自己做錯事會令對方唔開心，懂得認錯。

4. 處理完之後，一定要俾小朋友知道家長只係唔鐘意打人行為，並唔係唔鐘意佢，俾佢明白家長係對事不對人。

5. 處理小孩暴力行為時，家長們需要嚴肅但情緒要冷靜，太嬲就唔可以理性咁處理及善後。而且，一定唔可以以暴力行為制止小孩，如果唔係佢哋只會有樣學樣，變得情緒化及更常使用暴力。

更多文章：【教育方程式】小朋友行為反常爸媽卻無從入手？專家教2招引導孩子說出心底話！

6. 適時提供發洩情緒嘅管道，例如畫畫、一齊整勞作。如果體力過剩就帶小朋友去做運動，減少情緒失控導致嘅攻擊行為。

7. 多聆聽小孩嘅心事，亦可以從日常傾談中了解佢哋嘅價值觀。有好嘅對待事情態度就給予讚賞。相反有犯錯嘅時候，就糾正行為以及灌輸正確價值觀。